Llinell gymorth gwasanaeth eiriolaeth i gefnogi dinasyddion sydd yn byw yng Nghaerdydd a Bro Morgannwg i gael llais a dewis o ran gwasanaethau cymorth gofal cymdeithasol.

Mae Porth Eiriolaeth Caerdydd a’r Fro yn wasanaeth llinell gymorth i drigolion dros 18 oed yng Nghaerdydd a Bro Morgannwg.

Dyma un pwynt cyswllt i oedolion sydd yn chwilio am gymorth i’w helpu i gael bod yn rhan o benderfyniadau wrth gynllunio a darparu eu gofal a’u cymorth, fel diffinnir yn Neddf Gwasanaethau Cymdeithasol a Llesiant (Cymru) (2014).

Gall helpu’r rhai sydd yn derbyn gofal, angen cymorth neu weithwyr proffesiynol gofal/cymorth sydd yn poeni am ofal cymdeithasol a chymorth rhywun.

Gall Porth Eiriolaeth Caerdydd a’r Fro:

• Helpu pobl i ddeall eu sefyllfa, anghenion gofal cymdeithasol a chymorth, a’r opsiynau sydd yn agored iddynt
• Rhoi gwybodaeth, cyngor a chymorth i ddarganfod y gwasanaethau cywir i ddiwallu anghenion person
• Helpu pobl i ddeall gwybodaeth, trafodaethau, a phrosesau i wneud penderfyniadau gwybodus
• Helpu pobl i gael eu clywed, i siarad ar eu rhan a’u cyfeirio at wasanaethau eiriolaeth – gan gynnwys eiriolwr proffesiynol annibynnol (IPA).

Beth oedd y broblem?

Roedd dod o hyd i wybodaeth, cymorth ac eiriolaeth yn anodd i bobl sydd yn derbyn gofal, neu i’r bobl sydd ddim yn derbyn gofal ond efallai ei angen. Roedd hefyd yn rhoi her i weithwyr proffesiynol neu aelodau’r teulu a oedd yn poeni am ofal a chymorth cymdeithasol rhywun.

Nid oedd pwynt canolog ar gyfer gwybodaeth angenrheidiol pan ddaw at ofal cymdeithasol a chymorth. Golygai hyn bod nifer yn cael eu gadael ar ôl oherwydd diffygion yn y system.

Er mwyn sicrhau bod pobl yn cael y cymorth sydd ei angen ar yr adeg gywir, crëwyd y syniad o greu un pwynt mynediad ar gyfer cymorth.

Ein dull

Daeth sawl sefydliad at ei gilydd i greu Porth Eiriolaeth Caerdydd a’r Fro, gan gynnwys Cyngor Bro Morgannwg, Cyngor Caerdydd, Bwrdd Iechyd Prifysgol Caerdydd a’r Fro, Age Connects, Advocacy Matters (Cymru) a Diverse Cymru.

Gyda’r bwriad o fod yn fan cyswllt cyntaf, gellir cysylltu â’r llinell gymorth rhad ac am ddim yma ar 0808 801 0577 i gael gwybodaeth, cyngor a chymorth yn ymwneud ag eiriolaeth. Mae’n agored o ddydd Llun i ddydd Gwener, 9yb tan 5yp.

Mae’r llinell gymorth yn cael ei staffio gan dîm proffesiynol medrus iawn o Eiriolwyr Gynghorwyr Llinell Gymorth, a gyflogir gan ProMo Cymru.

Dywedodd Stephanie Hoffman, Pennaeth Gweithredu Cymdeithasol ProMo Cymru; “Mae ein harbenigedd yn datblygu ac yn darparu gwasanaethau gwybodaeth, cyngor, cymorth ac eiriolaeth ar-lein a digidol, ynghyd â’n henw da o ran gwerthfawrogi hawliau pobl, yn golygu mai ni yw’r dewis perffaith i ddatblygu a darparu’r gwasanaeth yma ar gyfer Caerdydd a Bro Morgannwg.”

Canlyniadau

Mae Porth Eiriolaeth Caerdydd a’r Fro wedi profi ei hun i fod yn adnodd hanfodol i drigolion Caerdydd a Bro Morgannwg sydd yn chwilio am gefnogaeth gyda’u hanghenion gofal a chymorth. Ers ei sefydlu, mae’r gwasanaeth wedi ymdrin â nifer o achosion ac atgyfeiriadau i Eiriolaeth Broffesiynol Annibynnol (IPA).

Mae Andrew Cole, Rheolwr Gweithredol Cyngor Bro Morgannwg, yn canmol effaith y gwasanaeth: “Mae’n wych cael porth syml a hygyrch i eiriolaeth yng Nghaerdydd a Bro Morgannwg. Mae’r porth yn galluogi unrhyw un i siarad am eu hanghenion eiriolaeth heb orfod gweithio allan gyntaf pa sefydliad i gysylltu ag ef.”

Wrth ddarparu un pwynt mynediad, mae’r Porth wedi symleiddio’r broses ar gyfer unigolion sydd yn chwilio am gymorth, gan sicrhau y gallant gysylltu â’r gwasanaethau priodol yn effeithlon. Mae’r dull canoledig hwn hefyd wedi cyfrannu at ymateb mwy cydgysylltiedig ac effeithiol i anghenion cymhleth y gymuned.

Mae llwyddiant y Porth yn destament i ymdrechion cydweithredol Cyngor Caerdydd, Cyngor Bro Morgannwg, Bwrdd Iechyd Prifysgol Caerdydd a’r Fro, Age Connects, Advocacy Matters (Cymru), a Diverse Cymru. Gyda’i gilydd, mae’r sefydliadau hyn wedi creu gwasanaeth cadarn a hygyrch sy’n gwneud gwahaniaeth diriaethol ym mywydau unigolion di-rif.