Croeso Marley

Mae ProMo Cymru yn falch iawn o groesawu Marley Mussington i’r tîm fel ein Intern Busnes.

Mae Marley wedi graddio mewn Rheoli Digwyddiadau ar ôl cyfnod o astudio ym Manceinion tan 2024. Yn ystod ei chyfnod ym Manceinion, llwyddodd Marley i gynllunio a chyflawni amrywiaeth o ddigwyddiadau, gan ddangos sgiliau trefnu a chreadigrwydd cryf. Enillodd brofiad gwerthfawr yn gweithio mewn nifer o ddigwyddiadau ar draws y ddinas, o uwchgynadleddau rhyngwladol a chynadleddau busnes i briodasau a gwyliau cerddoriaeth, gan fireinio ei gallu i ffynnu mewn amgylcheddau dynamig o dan bwysau uchel.

Yn ogystal â’i phrofiad digwyddiadau, mae Marley wedi canolbwyntio’n drwm ar waith hyrwyddo, gan ddylunio deunyddiau marchnata a chreu cynnwys cyfryngau cymdeithasol diddorol i hybu presenoldeb ac ymwybyddiaeth. Mae hefyd wedi creu digwyddiad ei hun i godi arian ar gyfer yr elusen Venture Arts, gan arddangos ei menter a’i hangerdd dros gefnogi’r gymuned.

Yn ProMo Cymru, mae Marley yn gweithio ar draws ein hadran Cyllid ac Adnoddau Dynol, yn parhau i ddatblygu ei galluoedd dadansoddol a’i dealltwriaeth o weithrediadau busnes.

“Rwy’n angerddol am adnoddau dynol a chyllid am fy mod yn credu bod y meysydd yma’n hanfodol i greu timau effeithlon ac effeithiol, sy’n bwysig iawn wrth reoli digwyddiadau,” meddai Marley.

“Mae deall ochr ariannol prosiectau a’r agwedd adnoddau dynol o reoli talent yn helpu i greu digwyddiadau mwy llyfn ac effeithiol. Rwy’n gyffrous am y cyfle i ddysgu a thyfu yn ProMo, ac edrychaf ymlaen at gyfrannu mwy wrth i mi barhau i ymgartrefu yn fy rôl.”

Croeso i’r tîm, Marley!