Arddangos Gwaith Ieuenctid Cymru yn Strasbwrg

Arddangos arfer da o Gymru mewn seminar iechyd meddwl a lles pobl ifanc yn Strasbwrg

Derbyniodd ProMo Cymru wahoddiad gan Bartneriaeth Ieuenctid Cyngor Ewrop i fynychu’r Seminar ar Iechyd Meddwl a Llesiant Ieuenctid yn Strasbwrg, Ffrainc rhwng 18 a 19 Mawrth 2025.

Iechyd Meddwl a Gwaith Ieuenctid

Yn mynychu’r seminar roedd pobl ifanc, gweithwyr ieuenctid, ymchwilwyr, a llunwyr polisi o ledled Ewrop, yn dod at ei gilydd i ddarganfod datrysiadau i’r heriau iechyd meddwl cynyddol y mae pobl ifanc yn eu hwynebu. Dros ddau ddiwrnod, roedd y gynhadledd yn gyfle i drafod, mynychu gweithdai a gwrando ar baneli arbenigol gyda’r nod o flaenoriaethu iechyd meddwl a lles mewn polisi ac arfer ieuenctid.

Yn agor y seminar, pwysleisiodd Tobias Flessenkemper, Pennaeth Adran Ieuenctid Cyngor Ewrop, rôl hanfodol gwaith ieuenctid wrth feithrin gwydnwch meddwl, “Gall gwaith ieuenctid helpu pobl ifanc i fabwysiadu patrymau iach, dod yn rhan o ymgysylltiadau cymdeithasol, diwylliannol a dinesig, datblygu sgiliau ymdopi, datrys problemau a sgiliau rhyngbersonol, a dysgu sut i reoli emosiynau.”

Fel yr unig berson yn cynrychioli Cymru, hwylusodd Cindy Chen, ein Pennaeth Cyfathrebu ac Ymgysylltu, sesiwn gyfochrog 45 munud yn y seminar i arddangos arbenigedd ProMo o ran ymgysylltu’n effeithiol â phobl ifanc a rhoi llais iddynt fedru cyflawni newidiadau personol, systemau a diwylliant.

Cyflwyno Meddwl Ymlaen Gwent

Rhannodd Cindy astudiaeth achos Meddwl Ymlaen Gwent (MYG), prosiect pum mlynedd a ariennir gan y Loteri Genedlaethol, i egluro sut rydym yn cyd-gynllunio gwasanaethau gyda phobl ifanc.  Nod MYG yw cynllunio datrysiadau arloesol i atal heriau iechyd meddwl rhag codi neu waethygu ar draws Gwent, Cymru, gan ddilyn dull Cynllunio Gwasanaeth. Mae’r broses yma yn ein harwain i greu atebion sy’n mynd i’r afael a gwir anghenion y defnyddwyr a’r pethau sylfaenol sydd yn achosi problemau

Siaradodd Cindy, sy’n rheoli’r prosiect Meddwl Ymlaen Gwent, â chydweithwyr Ewropeaidd am ddull cyd-gynhyrchu ProMo Cymru i sicrhau, nid yn unig bod pobl ifanc yn cael mynediad i wasanaethau iechyd meddwl, ond hefyd yn benseiri gweithredol systemau cymorth eu hunain. Esboniodd fod cyd-gynhyrchu ystyrlon wrth galon MYG, “Rydym yn cyflogi 11 o bobl ifanc fel Cynllunwyr Gwasanaeth Cyfoed ac yn eu cefnogi i ddefnyddio’r 5 piler gwaith ieuenctid, i lunio datrysiadau a fydd yn cael effaith barhaol.”

Bellach yn ei thrydedd flwyddyn, dyma flaenoriaethau pwysig Meddwl Ymlaen Gwent:

• Tyfu ein sianel cyfryngau cymdeithasol a chreu ymgyrchoedd fel y gallwn frwydro yn erbyn stigmateiddio, hyrwyddo gwasanaethau cymorth yng Ngwent a darparu gwybodaeth ddefnyddiol i bobl ifanc sy’n chwilio am gymorth
• Cyfarparu ein tîm o Gynllunwyr Gwasanaeth Cyfoed gyda’r sgiliau a’r hyder i gyflwyno dau gynnig addysg iechyd meddwl am ddim i weithwyr proffesiynol a phobl ifanc ledled Gwent
• Meithrin perthnasoedd allweddol gyda gweithwyr proffesiynol a rhanddeiliaid i ddylanwadu ar newid, llywio penderfyniadau ac ymateb i ddatblygiadau strategol (e.e. Strategaeth Iechyd Meddwl a Lles Llywodraeth Cymru 2025 – 2035)

Daeth y sesiwn i ben gyda Cindy yn annog cydweithwyr i ystyried sut y gallent wreiddio’r dull cyd-gynhyrchu yn well yn eu gwaith wrth ddarparu cymorth i bobl ifanc.

Mae ProMo Cymru yn frwd dros wneud gwahaniaeth i fywydau beunyddiol plant a phobl ifanc nawr, a chenedlaethau’r dyfodol.

Cysylltwch i wybod sut y gallem ni eich helpu i wneud hyn: cindy@promo.cymru