O Gymru i Falta: Uchafbwyntiau’r 4ydd Confensiwn Gwaith Ieuenctid Ewropeaidd

Yn gynharach eleni, cafodd Swyddog Cyfathrebu a Chynnwys ProMo Cymru, Halyna, y cyfle i fynychu’r 4ydd Confensiwn Gwaith Ieuenctid Ewropeaidd ym Malta.

---

Daeth dros 500 o aelodau’r gymuned gwaith ieuenctid ynghyd ar gyfer y digwyddiad yma, sydd yn digwydd bob 5 mlynedd, gan gynnwys llunwyr polisi, ymchwilwyr a gweithwyr ieuenctid.

O’r cychwyn cyntaf, roedd y digwyddiad yn brofiad dysgu enfawr i ProMo. Ymunom â’r ddirprwyaeth o Asiantaeth Gwybodaeth a Chwnsela Ieuenctid Ewrop (ERYICA), partner hirdymor ProMo.

Gweledigaeth Gwaith Ieuenctid a rennir

Mae Confensiwn Gwaith Ieuenctid Ewrop (EYWC) yn ddigwyddiad hanfodol ar gyfer dyfodol gwaith ieuenctid yn Ewrop. O dan y thema ‘Youth Work Xcelerate’, roedd yr agenda’n llawn gweithdai yn canolbwyntio ar dri maes craidd: Craidd Gwaith Ieuenctid, Amgylchedd Gwaith Ieuenctid, a Systemau Gwaith Ieuenctid.

Er mwyn sicrhau ein bod yn cael y mewnwelediadau mwyaf perthnasol i’n sefydliad, dewisom sesiynau yn ymwneud â:

• Monitro a gwerthuso gwaith ieuenctid i fesur ei effaith.
• Archwilio technolegau newydd, gan gynnwys sut i integreiddio offer digidol arloesol i wella effeithiolrwydd gwaith ieuenctid.
• Sut gall y sector cyhoeddus a gwirfoddol gydweithio i gryfhau gwaith ieuenctid ar lefelau cenedlaethol, rhanbarthol a lleol.

Roedd y sesiynau yma yn gyfle i gydweithwyr o bob cwr o Ewrop rannu profiadau, heriau ac awgrymiadau fydda’n helpu creu map ffordd ar gyfer y pum mlynedd nesaf.

Arferion a phrosiectau ysbrydoledig

Yn ogystal â’r gweithdai thematig, roedd sesiynau wedi’u neilltuo i rannu arferion, prosiectau a mentrau ysbrydoledig. Yn ystod y sesiynau yma, dysgom am brosiectau rhagorol, gan gynnwys:

• Gwaith ieuenctid wedi’i lywio gan drawma o brosiect ‘Voices of Young People in Ukraine‘. Yn rhannu profiadau pobl ifanc Wcráin a’r effaith y mae rhyfel wedi’i chael ar eu bywydau.

• Defnyddio AI mewn cyfathrebu cynhwysol gan Eurodesk. Archwilio pethau ymarferol fel capsiynau awtomatig a chynhyrchu testun amgen i sicrhau bod cynnwys digidol yn hygyrch i holl bobl ifanc. Roedd hefyd yn gyfle gwych i rannu’r offer digidol defnyddir yn ProMo.

Prif Bethau Dysgwyd

Er bod y sesiynau ffurfiol yn dda iawn, dros goffi a bwyd a sgyrsiau anffurfiol gyda chydweithwyr cafwyd mewnwelediadau gwerthfawr. Cawsom gyfle i rwydweithio â dirprwyaeth y DU, gan gynnwys Leigh Middleton o’r Asiantaeth Ieuenctid Cenedlaethol (Lloegr), Marion Allison o’r Cyngor Safonau CLD (Yr Alban), a Jamie Plant o’r Adran Addysg (Gogledd Iwerddon). Roedd yn wych cael cwrdd â Tom Weiser o WCIA, a oedd hefyd yn cynrychioli Cymru.

Sgwrsiom hefyd â thîm arweinyddiaeth ERYICA, gan gynnwys y Llywydd ar y pryd Patrick Burke a’r Cyfarwyddwr Anja Frohner, a roddodd fewnwelediadau gwych i waith ieuenctid ledled Ewrop.

Mae rhai o’r prif bethau dysgwyd yn cynnwys:

• Rydym yn gwneud gwaith gwych yng Nghymru. Dylid ymfalchïo yn ein darpariaeth gwaith ieuenctid, gyda chydbwysedd da o gefnogaeth statudol a thrydydd sector. Roedd yn hyfryd cael adborth mor gadarnhaol am ein prosiectau, fel llinell gymorth Meic a Meddwl Ymlaen Gwent.
• Rydym yn arweinydd gwaith ieuenctid digidol. Ar ôl siarad â llawer o’n cyfoedion Ewropeaidd, mae’n ymddangos ein bod ar y blaen pan ddaw at arbenigedd digidol a Deallusrwydd Artiffisial. Mae ein harbenigedd wedi’i seilio ar flynyddoedd o ddefnyddio digidol fel adnodd wrth ymgysylltu â phobl ifanc.

Beth nesaf?

Bydd canlyniadau’r gynhadledd hon yn bwydo i mewn i Fap Ffordd Ewropeaidd newydd a fydd yn tywys ein cymuned am y pum mlynedd nesaf. Rydym yn gyffrous i weld sut y bydd ein cyfraniadau ni, a gwaith cydweithwyr ledled Ewrop, yn llunio dyfodol gwaith ieuenctid.