Cyfle â Thâl: Ymunwch â Phanel Profiad Bywyd Ymchwil Iechyd Meddwl GIG Cymru

Rydyn ni’n chwilio am bobl 14 oed a hŷn i ymuno â 2 grŵp (1 ar gyfer pobl ifanc ac 1 ar gyfer oedolion) i’n helpu i lunio ymchwil iechyd meddwl yng Nghymru. 

Gwybodaeth am y prosiect ymchwil 

Mae pobl yn y DU yn aml yn aros am hir i gael cymorth iechyd meddwl. Yng Nghymru, mae system newydd yn cael ei chyflwyno o’r enw gwasanaethau iechyd meddwl ‘mynediad agored’. 

Mae hyn yn golygu: 

Bydd pobl yng Nghymru yn gallu dewis y math o gymorth maen nhw ei eisiau a byddan nhw’n gallu cael help ar yr un diwrnod ag y byddan nhw’n gofyn. 

Rydyn ni’n cynnal prosiect ymchwil cenedlaethol i ddeall a yw’r dull newydd hwn yn gweithio’n dda i bobl a gwasanaethau. 

Rydyn ni angen eich help 

Rydyn ni angen eich help i gynllunio’r astudiaeth ymchwil hon. Rydyn ni’n chwilio am bobl sydd â phrofiad bywyd o anawsterau iechyd meddwl neu sy’n gofalu am rywun sydd ag anawsterau o’r fath. Bydd eich profiad bywyd yn ein helpu i gynllunio’r astudiaeth. Bydd eich safbwynt yn helpu i sicrhau bod yr ymchwil yn ddefnyddiol ac yn adlewyrchu bywyd go iawn. 

Rydyn ni’n sefydlu dau ‘Banel Profiad Bywyd’. Bydd y grwpiau yn ein helpu i arwain a chefnogi’r ymchwil. 

Dyma beth rydyn ni’n chwilio amdano: 

• Pobl ifanc (14-20 oed) ac oedolion (18 oed a hŷn) 
• Pobl sydd â phrofiad o anawsterau iechyd meddwl/sy’n gofalu am oedolyn sydd ag anawsterau o’r fath 
• Pobl sydd wedi defnyddio gwasanaethau iechyd meddwl y GIG, neu wedi ceisio am gymorth 

Nid oes angen i chi wybod unrhyw beth am ymchwil – byddwch yn dysgu am hynny fel rhan o’r prosiect. Bydd eich profiad yn ein helpu i sicrhau bod yr ymchwil yn deg, yn glir ac yn ddefnyddiol. 

Beth fyddwch chi’n ei wneud 

Byddwn yn cwrdd fel grŵp naill ai ar-lein neu wyneb yn wyneb. Fel aelod o’r panel, byddwch yn: 

• Helpu i sicrhau bod yr iaith a’r termau a ddefnyddir yn yr ymchwil yn glir, yn hawdd eu deall ac yn berthnasol i’r cyhoedd  
• Rhannu eich syniadau am y ffordd orau o hyrwyddo’r ymchwil i’r cyhoedd 
• Darllen a rhoi adborth i ni ar wybodaeth am y prosiect  
• Ein helpu i wneud synnwyr o’n canfyddiadau o safbwynt y cyhoedd 

Nid oes angen unrhyw arbenigedd penodol arnoch i ymuno â’r grŵp. Byddwn yn darparu hyfforddiant os hoffech chi hynny. Mae angen i chi allu ymuno â chyfarfod o bell, naill ai ar ffôn, tabled neu gyfrifiadur. Os yw mynediad i’r rhyngrwyd yn broblem i chi, cysylltwch â ni i drafod (sarah@promo.cymru). 

Cyfarfodydd a thaliadau 

Fel arfer, bydd cyfarfodydd y prosiect yn cael eu cynnal ar-lein ac yn para tua 1–2 awr. Rydyn ni’n disgwyl cynnal tua 4–6 cyfarfod y flwyddyn, er efallai y bydd cyfarfodydd ychwanegol yn cael eu trefnu weithiau. Os bydd hyn yn digwydd, byddwn yn rhoi gwybod i chi ymlaen llaw. Efallai y byddwn hefyd yn cynnal cyfarfodydd wyneb yn wyneb, gallwn drafod hyn gyda chi os oes gennych chi ddiddordeb mewn ymuno â ni. 

Mae’r sesiynau wedi’u cynllunio i fod yn gyfeillgar ac yn gefnogol, gan sicrhau profiad cadarnhaol i bawb sy’n cymryd rhan. Byddwn yn gweithio gyda’n gilydd gan ddefnyddio dull cyd-ddylunio, sy’n golygu y bydd eich llais yn cael ei werthfawrogi’n gyfartal ochr yn ochr â’r ymchwilwyr, a bydd eich syniadau’n llywio’r prosiect yn uniongyrchol.  

Byddwch yn cael £27.50 yr awr am eich amser i baratoi ar gyfer pob cyfarfod a mynd iddynt. Bydd hyn yn cael ei dalu mewn talebau os ydych chi dan 16 oed. Gallwch ofyn am lai os bydd hyn yn effeithio ar eich budd-daliadau.  

Oes gennych chi ddiddordeb? 

Cofrestrwch eich diddordeb drwy lenwi’r ffurflen Mynegi Diddordeb erbyn Dydd Sul 1af o Dachwedd. 

Am ragor o wybodaeth, cysylltwch â: sarah@promo.cymru