Hyfforddiant Iechyd Meddwl Am Ddim yng Ngwent

Dewch i ni fod yn onest: gall siarad am iechyd meddwl deimlo braidd yn lletchwith weithiau. Ond nid oes rhaid iddo fod fel hyn!

---

Mae cael sgyrsiau agored a chefnogol yn hynod bwysig ar gyfer ein lles. Dyna pam fod prosiect Meddwl Ymlaen Gwent wedi camu ymlaen i gynnig sesiynau hyfforddiant rhyngweithiol, am ddim, i helpu gweithwyr proffesiynol a phobl ifanc yng Ngwent i fagu’r sgiliau a’r hyder i gynnal y sgyrsiau pwysig yma.

Ar gyfer gweithwyr proffesiynol: Mwyhau eich cefnogaeth i bobl ifanc

Ydych chi’n gweithio gyda phobl ifanc yng Ngwent? Mae ein ‘Gweithdy Sgyrsiau Iechyd Meddwl’ wedi’i deilwra i chi. Mae’n sesiwn ryngweithiol ddwy awr sydd ar gael ar-lein ac wyneb i wyneb. Fe’i datblygwyd, ac mae’n cael ei gyflwyno, gan bobl ifanc! Felly byddech chi’n cael safbwyntiau dilys, bywyd go iawn, ar sut i gefnogi pobl ifanc mewn ffyrdd sydd wir yn gynorthwyol iddynt.

Yr hyn byddech chi’n derbyn:

• Dealltwriaeth ddyfnach o iechyd meddwl a lles pobl ifanc
• Adnoddau ymarferol i ymdrin â sgyrsiau iechyd meddwl gyda mwy o hyder
• Cyfle i gymryd rhan mewn gweithgareddau ymarferol a derbyn adborth amser real, gan sicrhau eich bod chi’n teimlo’n fwy parod yn dilyn yr hyfforddiant

Mae’r gweithdy yma’n ddelfrydol ar gyfer unrhyw un sy’n gweithio gyda phobl ifanc, gan gynnwys athrawon ysgol, gweithwyr ieuenctid, hyfforddwyr chwaraeon, a hwyluswyr clybiau ar ôl ysgol.

Os yw hyn yn swnio fel y byddai’n berffaith ar gyfer chi neu’ch tîm, cofrestrwch am sesiwn am ddim!

Ar gyfer pobl ifanc: Meithrin hyder wrth gefnogi dy hun a dy ffrindiau

Eisiau cael gwell gafael ar iechyd meddwl, boed hynny i ti dy hun neu i roi help llaw i dy ffrindiau? Mae ein sesiynau rhyngweithiol dwy awr am ddim yn unigryw gan mai pobl ifanc sy’n eu cyflwyno ar gyfer pobl ifanc. Mae hyn yn creu lle diogel a chefnogol lle fedri di ddysgu, rhannu, a meithrin hyder go iawn wrth siarad am iechyd meddwl. Dim distawrwydd lletchwith, ond sgyrsiau gonest a sgiliau ymarferol.

Yn y gweithdy yma, byddi di’n archwilio:

• Beth mae iechyd meddwl yn ei olygu mewn gwirionedd
• Sut mae sgyrsiau agored yn helpu i chwalu stigma
• Sut i adnabod pan fydd rhywun efallai angen cefnogaeth a sut i’w gynnig
• Gweithgareddau a chwarae rôl i roi hwb i dy sgiliau gwrando a chyfathrebu
• Cysyniadau pwysig fel ymddiriedaeth, gosod ffiniau, a deall cyfrinachedd er mwyn helpu ti i deimlo’n fwy parod i siarad am iechyd meddwl gyda ffrindiau

Mae’r sesiwn yma’n berffaith ar gyfer pobl ifanc 14 i 25 oed, sy’n byw yng Ngwent.

P’un a wyt ti’n cefnogi ffrind rwyt ti’n poeni amdanynt neu dim ond eisiau dysgu mwy, bydd y sesiwn yma’n rhoi’r adnoddau i ti i gael sgyrsiau agored a chefnogol am iechyd meddwl a lles.

Byddem wrth ein boddau i ti  ymuno â ni! Cofrestra am sesiwn am ddim i ti a dy ffrindiau, neu ofyn i athro neu weithiwr ieuenctid i drefnu sesiwn ar gyfer grŵp ohonoch.