Datrysiadau Iechyd Meddwl dan Arweiniad Ieuenctid ar gyfer Gwent

Cynllunio, adeiladu a chreu gwasanaethau iechyd meddwl gwell gyda phobl ifanc yng Ngwent.

Ein dull

Mae prosiect Meddwl Ymlaen Gwent (MYG) yn gydweithrediad 5 mlynedd rhwng ProMo Cymru a Mind yng Ngwent, gan weithio mewn partneriaeth â gwasanaethau ieuenctid lleol a Minds ledled Blaenau Gwent, Caerffili, Sir Fynwy, Casnewydd a Thorfaen. Mae’r bartneriaeth yn cefnogi pobl ifanc i gyd-gynllunio a datblygu dulliau newydd sy’n canolbwyntio ar ddatrysiadau ar gyfer iechyd meddwl a gwydnwch pobl ifanc, gan ddefnyddio methodoleg cynllunio gwasanaeth – Darganfod, Diffinio, Datblygu, Cyflawni.

Rydym wedi recriwtio ac yn talu 11 o ymchwilwyr cyfoed (16-24 oed) ledled Gwent i arwain cyfeiriad y prosiect. Gan eu cydnabod fel gwir gydweithwyr, maent yn cael eu talu’r Cyflog Byw Gwirioneddol i helpu i symud y prosiect hwn ymlaen. Mae’r cyfuniad unigryw o waith ieuenctid a chyflogaeth wedi cynyddu eu hymrwymiad, gan arwain at waith o ansawdd gwell sydd yn fwy effeithiol.

Er mwyn cynyddu cyfranogiad i’r eithaf, rydym yn cyfuno dulliau gwaith ieuenctid digidol ag gwyliau preswyl wyneb i wyneb amhrisiadwy ar gyfer gwaith cydweithredol dyfnach a gweithgareddau adeiladu tîm.

“Mae fy ngwaith gyda ProMo Cymru wedi cael effaith domino positif sydd wedi gwella fy mywyd am y gorau… Rwy’n edrych ymlaen at yr hyn sydd gan y dyfodol i’w gynnig a ble bynnag byddaf yn mynd neu beth bynnag dwi’n ei wneud, yn fan hyn cychwynnodd y cyfan.” – Lexy, Cynllunydd Gwasanaeth Cyfoed

Canlyniadau

Darganfyddiadau’r Cyfnod Darganfod

Sefydlodd y cyfnod Darganfod gwir anghenion pobl ifanc Gwent, gan gasglu mewnwelediadau gan 203 o gyfranogwyr rhwng 11 a 27 oed. Tynnodd yr ymchwil gynhwysfawr yma sylw at feysydd pryder hanfodol, yn enwedig:

• Diffyg gwybodaeth am y gwasanaethau iechyd meddwl sydd ar gael
• Ofn stigma
• Angen hanfodol am gefnogaeth ddibynadwy, hyblyg a chyson.

Mae Adroddiad Darganfod Meddwl Ymlaen Gwent yn amlinellu saith mewnwelediad allweddol a arweiniodd at ddiffinio tri llinyn craidd datrysiad:

1. Ymgyrchu a’r Cyfryngau Cymdeithasol
2. Hyfforddiant
3. Ymgysylltu â Rhanddeiliaid

1. Ymgyrchu a’r Cyfryngau Cymdeithasol

Mae’r tîm Ymgyrchoedd, dan arweiniad Cynllunwyr Gwasanaeth Cyfoed a dderbyniodd hyfforddiant cynhwysfawr gan ProMo Cymru, yn rhedeg y cyfrif Instagram @KeepInMindGwent.

Daw’r cynnwys yn uniongyrchol gan y rhai sy’n ei ddeall orau: pobl ifanc eu hunain. Mae’r rhannu rhwng cyfoedion yma yn cynnig effaith llawer mwy, gallant wir uniaethu ag ef a meithrin ffydd mewn ffordd sydd yn aml ddim yn digwydd gydag ymgyrchoedd proffesiynol traddodiadol.

Enghraifft yw fideo sy’n tywys person ifanc trwy’r profiad o fynychu ymgynghoriad iechyd meddwl, gan gynnig camau ymarferol i leddfu pryder a gwneud y cam cyntaf yn llai brawychus.

Mae ein hallgymorth digidol yn cael ei ategu gan ymgysylltu wyneb yn wyneb mewn digwyddiadau cymunedol, gan sicrhau bod y neges dan arweiniad pobl ifanc yn cyrraedd pob rhan o Went.

Nododd Eli, Cynllunydd Gwasanaeth Cyfoed a Chydlynydd Ymgyrchoedd MYG, fod gweld pobl ifanc yn trafod lles meddwl wedi “cynyddu hygyrchedd ein cynnwys… ac wedi grymuso pobl ifanc â phrofiad byw i gefnogi eu cymuned a chreu’r newid maen nhw am ei weld.”

2. Hyfforddiant

Mae ein dwy raglen hyfforddi sgyrsiau iechyd meddwl pwrpasol ar gyfer pobl ifanc a gweithwyr proffesiynol yn unigryw oherwydd nid cyd-gynllunwyr yn unig ydynt – nhw yw’r prif hyfforddwyr.

Mae’r dull yma yn grymuso pobl ifanc yng Ngwent wrth eu cyfarparu â’r sgiliau a’r hyder i gychwyn sgyrsiau iechyd meddwl hanfodol ac arwain cyfoedion at wasanaethau lleol.

“Helpodd yr hyfforddiant i mi i deimlo’n fwy hyderus am sut i gychwyn sgwrs gyda rhywun sydd efallai’n cael trafferth gyda’u hiechyd meddwl.” – cyfranogwr hyfforddiant.

Mae’r dull yma hefyd yn uwchsgilio gweithwyr proffesiynol wrth ddarparu adnoddau ac iaith ymarferol i’w helpu i gyfathrebu mewn ffordd sy’n gwneud i bobl ifanc deimlo fel eu bod yn cael eu clywed a’u cefnogi, gan sicrhau bod yr hyfforddiant yn mynd y tu hwnt i ddamcaniaeth.

Mae ein hyfforddiant am ddim yn canolbwyntio ar:

• Gwella dealltwriaeth o iechyd meddwl a lles pobl ifanc
• Darparu adnoddau ymarferol
• Cyfle i ymarfer a chael adborth

Roedd adborth gan weithwyr proffesiynol a fynychodd yr hyfforddiant yn cynnwys:

“Gwych bod hyfforddiant wedi’i gynhyrchu gan bobl ifanc yn cael ei rannu gyda gweithwyr proffesiynol ac iaith a rennir.”

“Roedd clywed yn uniongyrchol gan bobl ifanc yn amhrisiadwy.”

Mae’r llwyddiant yn ymwneud â’r gwir brofiad bywyd a gyflwynir gan yr hyfforddwyr ifanc, sy’n dangos y gall hyfforddi cefnogol eu trawsnewid yn hwyluswyr cymhellol.

3. Ymgysylltu â Rhanddeiliaid

Mae’r grŵp Ymgysylltu â Rhanddeiliaid yn cysylltu, rhwydweithio a chydweithio’n weithredol â gweithwyr proffesiynol a sefydliadau i hyrwyddo’r nodau uchelgeisiol a amlinellir yn strategaeth 10 mlynedd iechyd meddwl a lles Llywodraeth Cymru.

Un o’n llwyddiannau pwysig oedd gweithio gyda Phaneli Llesiant SPACE (Un Pwynt Mynediad ar gyfer Llesiant Emosiynol Plant). Sylwodd ein tîm ar rwystr mawr; ni allai pobl ifanc ddod o hyd i’r ffurflenni hunangyfeirio na’u deall yn hawdd. Gweithiodd y Cynllunwyr Gwasanaeth Cyfoed yn uniongyrchol â’r paneli i awgrymu newidiadau, gan arwain at broses hunangyfeirio mwy clir a chyfeillgar i bobl ifanc.

Dywedodd Tracey Smith, Rheolwr Tîm Llesiant SPACE, “Mae MYG wedi dylanwadu’n sylweddol arnom wrth ymgorffori llais pobl ifanc yn y broses cynllunio gwasanaeth, gan alluogi cyd-gynhyrchu drwy fentrau dan arweiniad cyfoedion ac ysbrydoli newid diwylliant tuag at gefnogaeth iechyd meddwl sy’n cael ei gyrru gan bobl ifanc ledled Gwent.”

Dyma arddangosiad pwerus o lais pobl ifanc yn dylanwadu ar newid systemig.

Yn ogystal, rydym wedi creu cymuned ymarfer gref yng Ngwent gan dynnu gweithwyr proffesiynol sy’n cefnogi iechyd meddwl pobl ifanc at ei gilydd ddwywaith y flwyddyn yng Nghasnewydd. Mae’r cyfarfodydd yma yn cynnig lle diogel i randdeiliaid rannu arfer gorau, datrys problemau a dysgu oddi wrth ei gilydd.

Mae croeso i unrhyw un sy’n gweithio gyda phobl ifanc neu o fewn gwasanaethau iechyd meddwl yng Ngwent i fynychu’r digwyddiadau yma.

---

Mae llwyddiant ein prosiect yn ymwneud â gwir ymrwymiad i egwyddorion cyd-gynllunio, gan sicrhau nad buddiolwyr yn unig yw’r bobl ifanc ond yn brif benseiri newid hefyd.