Cryfhau Llesiant Gyda Sgwrs ym Mlaenau Gwent

Mae ein Prosiect Cwnsela Cymunedol yn Institiwt Glyn Ebwy (EVI) yn gwneud gwir wahaniaeth. Mae cwnsela un-i-un am ddim wedi helpu cyfranogwyr i feithrin hyder, gwella hunan-barch, a rheoli straen, iselder, a phryder – yn digwydd mewn gofod tawel, croesawgar yng nghanol y gymuned.

Dros yr ychydig flynyddoedd diwethaf, mae lleoli gwirfoddolwyr, sesiynau hyfforddi, a gweithgareddau cymunedol yn EVI wedi tynnu sylw at angen cynyddol am therapïau siarad hygyrch. Dywedodd llawer o bobl leol wrthym eu bod eisiau cefnogaeth i reoli eu hiechyd meddwl, meithrin hyder, a datblygu sgiliau personol. Roedd 90% o’r bobl a oedd yn rhan o’n proses fentora yn dweud mai’r rhain oedd y rhwystrau mwyaf iddynt gael gwaith neu hyfforddiant.

I ymateb i hyn, lansiwyd Prosiect Cwnsela Cymunedol EVI, sydd bellach wedi darparu dros 110 awr o gwnsela am ddim, gan ddarparu hyd at 12 sesiwn am ddim i bob cyfranogwr ac arbed tua £8,160 i’r gymuned mewn costau therapi.

Gwireddir y prosiect hwn trwy gyllid Cronfa Ffyniant a Rennir Llywodraeth y DU.

Dull Cydweithredol a Moesegol

Mae’r prosiect yn dwyn ynghyd cwnselwyr dan hyfforddiant ar leoliad gwaith proffesiynol a cwnselwyr gwirfoddol cymwys Tîm Lleoli Astudiaethau Therapiwtig Prifysgol De Cymru a Chwnsela’r Fenni i ddarparu cymorth diogel ac effeithiol. Mae pob cwnselydd yn gweithio o dan oruchwyliaeth broffesiynol ac yn dilyn fframwaith moesegol Cymdeithas Cwnsela a Seicotherapi Prydain (BACP).

Mae’r dull cydweithredol yma wedi galluogi canlyniadau mesuradwy, positif i unigolion a’r gymuned ehangach.

Yr Effaith

Mae cyfranogwyr wedi nodi gwelliannau sylweddol, gan gynnwys cynnydd o 135% mewn hunan-barch a hwb o 121% mewn hyder. Mae teimladau o iselder, pryder a straen wedi gostwng 64% a 57%, yn y drefn honno.

Mae’r prosiect hefyd wedi gweld mwy o ddynion yn cael mynediad i gefnogaeth, gyda chyfran o hunan atgyfeiriadau yn dod gan ddynion – cam positif wrth chwalu rhwystrau iechyd meddwl.

Y peth arbennig am y prosiect hwn yw ei leoliad yng nghalon cymuned Glyn Ebwy yn EVI, gyda chyfoeth o gefnogaeth a gwasanaethau eraill yn yr adeilad (Gwasanaeth Ieuenctid Blaenau Gwent, Cymunedau am Waith, Llamau, Gwent N-Gage Barod, Pantri EVI, Caffi Cymunedol EVI, ymysg mwy) – gan helpu cyfranogwyr i deimlo eu bod yn cael eu cefnogi, eu cysylltu, ac yn gallu tyfu.

Creu Gofod ar gyfer Cefnogaeth

Fel rhan o’r prosiect, trawsnewidiwyd yr hen stiwdio recordio yn EVI yn lle tawel, croesawgar ar gyfer cwnsela, ymwybyddiaeth ofalgar, a gweithgareddau lles – gan greu amgylchedd a gynlluniwyd i gefnogi iechyd meddwl ac emosiynol y cyfranogwyr.

Lleisiau’r Cyfranogwyr

“Teimlais fod y sesiynau yma’n ddefnyddiol iawn, yn enwedig y rhai ychwanegol a helpodd fi i fod yn fwy agored. Mae Lynette wedi bod yn broffesiynol, yn hawdd siarad â hi, ac mae hi bob amser wedi creu lle i mi fyfyrio ar faterion sydd wedi rhoi trafferth i mi ers blynyddoedd lawer.” – Cyfranogwr Prosiect Cwnsela Cymunedol

“Am y tro cyntaf, gallwn drafod materion y gorffennol, er eu bod yn anodd, roedd yn help i mi brosesu a dod i dderbyn fy emosiynau. Heriodd Lynette rai o fy meddyliau a’m teimladau, a brofodd yn ddefnyddiol iawn.” – Cyfranogwr Prosiect Cwnsela Cymunedol

“Roedd y gefnogaeth yn help i mi fedru deall y pethau sydd wedi fy mhoeni ers plentyndod. Rwy’n teimlo’n fwy parod i ymdopi â phryder ac iselder ac rwy’n optimistaidd am y dyfodol.” – Cyfranogwr Prosiect Cwnsela Cymunedol

Gallwn Helpu Chi i Wneud Hynny Hefyd

Rydym yn cynnig ymgynghoriaeth a chymorth i sefydliadau sy’n awyddus i gynllunio a darparu gwasanaethau iechyd meddwl a lles sy’n cael gwir effaith.

P’un a ydych chi’n cynnal prosiectau cymunedol, ymchwil, neu raglenni cymorth, gallwn eich helpu i:

• Cyd-gynllunio gwasanaethau hygyrch sy’n canolbwyntio ar bobl
• Casglu mewnwelediad i wella canlyniadau i’ch cymuned
• Cysylltu cyfranogwyr â rhwydweithiau cymorth ehangach

Siaradwch â ni. Byddem wrth ein bodd yn eich helpu i gryfhau lles a chreu effaith wirioneddol, barhaol – yn union fel yr ydym wedi’i wneud gyda Meddwl Ymlaen Gwent a Phrosiect Cwnsela Cymunedol EVI.