Signapse: Defnyddio AI i Wella Hygyrchedd i Ddefnyddwyr BSL

Mae ProMo Cymru yn partneru â Signapse AI i droi cynnwys digidol yn fwy hygyrch gyda Iaith Arwyddion Prydain (BSL).

---

Mae ProMo yn defnyddio’r bartneriaeth hon i archwilio sut y gall cyfieithu BSL â chymorth AI gefnogi cyfathrebu digidol wrth arbed amser a lleihau rhwystrau i weithredu.

Mae Signapse yn sefydliad Byddar yn gyntaf sy’n defnyddio AI i gyfieithu cynnwys ysgrifenedig yn fideos iaith arwyddion o ansawdd uchel. Gellir mewnosod y cyfieithiadau yma’n uniongyrchol i wefannau gan ddefnyddio ategyn syml, gan ganiatáu i ddefnyddwyr gael mynediad at gyfieithiadau BSL mewn amser real wrth iddynt ryngweithio â chynnwys tudalen. Yn ystod y cyfnod datblygu yma, cefnogir y dechnoleg gyda dull person yn rhan o’r broses, lle mae cyfieithwyr BSL cymwys yn adolygu’r AI tra ei fod yn parhau i ddysgu.

I gefnogi datblygiad parhaus y dechnoleg, rydym wedi rhannu 170 o erthyglau o’n gwefan i helpu i hyfforddi system AI Signapse.

Mae Signapse yn datblygu’r dechnoleg yma gyda chefnogaeth prosiect gwerth $1.5 miliwn a ariennir gan Google. Fel rhan o’r gwaith yma, gall nifer gyfyngedig o sefydliadau trydydd sector yn y DU ac UDA gyfieithu hyd at 10 tudalen gwefan i Iaith BSL neu ASL.

Rydym yn falch o fod yn un o’r sefydliadau a ddewiswyd i gymryd rhan. Rydym wedi gweithio gyda Signapse i gyfieithu ein cyfres adnoddau ‘Creu Gwasanaethau Cynhwysol‘.

Ar hyn o bryd, mae’r ategyn yma a ddarperir gan Signapse ar gael ar gyfer tudalennau Saesneg yn unig wrth iddynt weithio ar berffeithio’r defnydd o AI. Maent wedi ymrwymo i archwilio’r posibilrwydd o ehangu i ieithoedd eraill yn y dyfodol. I ddysgu mwy am gynnig Signapse i sefydliadau’r trydydd sector, cliciwch yma.