Gwneud digidol yn haws i’r trydydd sector yng Nghymru

Trosolwg

Yn seiliedig ar ymchwil a byd sydd yn newid yn gyflym, sylweddolodd ProMo Cymru, CGGC a Cwmpas yr angen cynyddol i gefnogi’r trydydd sector gyda hyfforddiant, cefnogaeth a gwybodaeth ar bopeth digidol.

Arweiniodd hyn at greu Newid, rhaglen wedi’i ddatblygu a’i chyflwyno mewn partneriaeth rhwng CGGC, Cwmpas, a ProMo Cymru, wedi’i ariannu gan Lywodraeth Cymru a’i chefnogi gan CDPS. Y nod yw cefnogi sefydliadau’r trydydd sector yng Nghymru i feithrin hyder a gallu wrth ddefnyddio gwasanaethau digidol a deall safon gwasanaethau digidol Cymru.           

Hyd yma, mae Newid wedi cefnogi cannoedd o sefydliadau ledled Cymru.

Ein Dull Gweithredu

Mae ein dull gweithredu yn canolbwyntio ar gefnogi’r sector i gynllunio a phrofi gwasanaethau digidol sy’n canolbwyntio ar y defnyddiwr, gan feithrin hyder mewn gwasanaethau digidol trwy brofiad ymarferol.

Rydym yn gwneud hyn gyda:

Hyfforddiant a Mentora

Rydym yn cefnogi sefydliadau i gynllunio gwasanaethau gwell gan ddefnyddio adnoddau digidol a chynllunio sy’n canolbwyntio ar y defnyddiwr.

Rydym yn darparu hyfforddiant ymarferol sy’n helpu sefydliadau i feithrin eu sgiliau digidol a’u hyder. Mae hyn yn cynnwys ein cwrs Cynllunio Gwasanaeth Digidol, sy’n cyfuno mentora, hyfforddiant grŵp, a gweithdai wyneb yn wyneb. Mae cyfranogwyr yn defnyddio dulliau cynllunio gwasanaeth i ymchwilio i anghenion defnyddwyr, datblygu prototeipiau a phrofi datrysiadau ar gyfer yr heriau y maent yn eu hwynebu.

Mae ein hyfforddiant yn helpu sefydliadau i:

• Mewnosod ffyrdd digidol o weithio
• Cynllunio a phrofi datrysiadau digidol gan ddefnyddio adnoddau dim cod a chost isel
• Gwella sgiliau a hyder digidol ar draws timau
• Cynllunio gwasanaethau sy’n diwallu anghenion defnyddwyr

Dywed cyfranogwyr blaenorol

“Brys mawr yw fy mywyd gwaith ran amlaf, felly mae cael amser i ymchwilio a datblygu wedi gwneud gwahaniaeth… mae’r profiad a’r wybodaeth darparwyd gan y staff wedi fy helpu i ddefnyddio fy amser yn effeithiol iawn.”

“Dysgais efallai ein bod yn meddwl ein bod yn deall y cyfeiriad cywir dylid ei gymryd, ond gall cynnwys defnyddwyr gwasanaeth newid natur y prosiect yn llwyr er gwell.”

“Rwy’n gwella pob rhan o fy niwrnod gwaith yn gyson wrth feddwl sut y gallaf weithredu’r hyn rwyf wedi’i ddysgu.”

“Mae’r ffaith nad oedd rhaid i mi fod yn berffaith yn syth wir wedi newid fy meddylfryd yn broffesiynol ac yn bersonol.”

Cyfathrebu ac Adnoddau

ProMo sy’n arwain ar gyfathrebu Newid. Rydym yn sicrhau bod negeseuon a brandio’r bartneriaeth yn glir ac yn gyson.

Mae hyn yn cynnwys:

• Cynhyrchu’r brandio a’r dyluniadau
• Datblygu offer a chynnwys yn seiliedig ar anghenion a nodwyd gennym trwy ein gwaith gyda sefydliadau trydydd sector. Mae hyn yn cynnwys asesiad risg AI, templed CRM y gellir ei addasu, a ffordd o fesur Mabwysiadu Technoleg Ddigidol eich sefydliad.
• Creu pecyn cymorth cyfathrebu gyda negeseuon allweddol, canllawiau cynnwys, delweddau a thempledi at ddefnydd partneriaid Newid
• Cynhyrchu cylchlythyr misol i rannu diweddariadau, dysgu a chyfleoedd o fewn y sector
• Adeiladu a rheoli gwefan Newid, gan gynnwys cadw’r wefan yn gyfredol, gyda manylion am gefnogaeth, digwyddiadau ac adnoddau newydd
• Creu cynnwys cyfryngau cymdeithasol ac olrhain y cyrhaeddiad a’r ymgysylltiad cyffredinol ar draws y bartneriaeth
• Cynhyrchu cynnwys fideo dwyieithog

Ein nod yw ei gwneud hi’n haws i sefydliadau ddeall a chael mynediad at gefnogaeth Newid.

Ymchwil i Anghenion y Sector

Rydym yn cynnal ymchwil defnyddwyr i ddeall anghenion y sector.

Yn 2024, cyhoeddwyd Adroddiad Darganfod Newid, yn seiliedig ar gyfweliadau ag arweinwyr sefydliadau trydydd sector o wahanol feintiau a lefelau aeddfedrwydd digidol. Ein nod oedd deall yr heriau y maent yn eu hwynebu a nodi ble y gallai datrysiadau digidol ddarparu cefnogaeth.

Rydym hefyd wedi gweithio gyda Chynghorau Gwirfoddol Sirol (CVCs) i gynnal prosiectau ymchwil wedi’u targedu. Roedd hyn yn cynnwys adolygu astudiaethau blaenorol, cynnal cyfweliadau a rhannu canfyddiadau trwy adnoddau ac adroddiadau ymarferol.

Mae’r mewnwelediadau yma yn llywio syniadau a phrototeipiau newydd, fel Dewch i Ni Drafod Digidol, cyfarfodydd ar-lein lle gall CVCs rannu arfer da ac archwilio pa gefnogaeth sydd fwyaf defnyddiol.

Canlyniad

Mae Newid yn parhau i ymateb i anghenion y sector. Mae ein cefnogaeth wedi helpu cannoedd o sefydliadau i ddatblygu eu hyder wrth ddefnyddio digidol a gwella eu gwasanaethau ar gyfer eu defnyddwyr.

Wrth gyfuno hyfforddiant, cyfathrebu, cynllunio gwasanaeth, ac ymchwil, rydym yn gweithio i helpu’r trydydd sector i ddefnyddio digidol mewn ffyrdd sy’n ymarferol, yn fforddiadwy, ac yn briodol ar gyfer eu hanghenion.

Os oes gennych unrhyw gwestiynau, cysylltwch ag arielle@promo.cymru am sgwrs.