Sut i newid eich strategaeth ddigidol i fod yn fwy cynhwysol
Awdur: Helen Olsowska;
Amser Darllen: 4 munud
Mae hwn yn adnodd agored. Mae croeso i chi ei gopïo a'i addasu. Darllenwch y telerau.
Mae arwain newid digidol a bod yn fwy cynhwysol ar yr un pryd yn bwysig i’ch elusen.
Bydd yr adnodd yma yn eich helpu i gynllunio trawsnewid digidol mewn ffordd gynhwysol. Mae’n addas ar gyfer:
• Arweinwyr sydd yn gwneud penderfyniadau strategol am drawsnewid digidol mewn elusen neu sefydliad dielw
• Arweinwyr digidol sydd yn rheoli strategaeth ddigidol neu broses drawsnewid
Mae’n trafod:
- Creu tîm prosiect
- Deall eich cynulleidfaoedd neu ddefnyddwyr
- Cynllunio ar gyfer cynwysoldeb
- Creu strategaeth hygyrch
1. Creu tîm prosiect
Mae timau prosiect o bobl amrywiol yn fwy tebygol o greu strategaeth gynhwysol. Mae hyn yn golygu cynnwys pobl o wahanol hil, rhyw, rhywioldeb a chrefydd o fewn y tîm. Ond mae mathau eraill o amrywiaeth dylid ystyried hefyd:
- Gwahanol dimau ar draws y sefydliad sydd ag anghenion gwahanol
- Lefelau sgiliau digidol gwahanol
- Profiad byw o’r materion y mae’r elusen yn eu cefnogi
Bydd creu tîm prosiect eang yn eich helpu i ddeall pobl yn well a lleihau’r tebygolrwydd o ragdybiaethau anghywir am eu hanghenion.
2. Deall eich cymuned
Bydd cymuned yr elusen yn ganolog i strategaeth ddigidol gynhwysol. Bydd yn deall eu hanghenion boed fel defnyddwyr, staff, gwirfoddolwyr neu randdeiliaid eraill.
Ni fydd data eich sianeli digidol yn egluro popeth. Rydych chi angen deall anghenion, teimladau ac ymddygiad pobl hefyd.
Gall ymchwil defnyddwyr ddarparu’r wybodaeth sydd ar goll.
Casglwch ddata defnyddwyr o ansawdd wrth gynnal cyfweliadau manwl. Sicrhewch eich bod yn siarad â chynrychiolwyr o wahanol grwpiau:
- Mae 14.6 miliwn o boblogaeth y DU yn anabl. Rhaid cynnwys pobl anabl
- Mae tlodi digidol yn fwy o broblem nag y mae’r mwyafrif yn ei ddeall. Rhaid cynnwys pobl sydd yn ddiffyg sgiliau, data neu ddyfeisiau eu hunain
- Mae 14% o boblogaeth y DU yn perthyn i grŵp ethnig lleiafrifol. Rhaid cynnwys y bobl yma hefyd
Mae cynnwys defnyddwyr o’r cychwyn hyd at y diwedd wrth gynllunio’n ddigidol yn arwain at ganlyniadau gwell bob tro.
Creu personâu defnyddwyr
Defnyddiwch ganlyniadau eich ymchwil i greu cyfres o bersonâu defnyddwyr. Ysgrif bortread yw’r rhain o’ch defnyddwyr arferol. Maent yn gymorth i chi gofio am eich defnyddwyr wrth i chi ysgrifennu strategaeth ddigidol.
Mae sefydliadau fel Microsoft wedi creu ‘personâu sbectrwm’. Efallai bod gan bob sbectrwm o bersonâu anghenion tebyg, ond nodweddion gwahanol, neu’r ddau. Er enghraifft, sbectrwm o anableddau gydag anghenion mynediad gwahanol.
Gallech barhau i gyfeirio at y personâu wrth i chi gyflawni eich strategaeth.
3. Cynllun ar gyfer cynwysoldeb
Mae strategaeth ddigidol gynhwysol yn gofyn am weithredu positif. Creu cynlluniau penodol sydd yn nodi sut bydd y strategaeth yn cynnwys grwpiau sydd ar y cyrion.
Gallai hyn gynnwys:
- Ymchwil defnyddwyr a phrofi penodol gyda grwpiau sydd ar y cyrion
- Datblygu rhestr wirio o anghenion defnyddwyr ar gyfer grwpiau ar y cyrion, yn seiliedig ar ymchwil
Canllawiau cynhwysiant
Gosod rhai canllawiau i helpu tîm y prosiect i greu strategaeth gynhwysol.
Gallai eich canllawiau gynnwys:
- Adnabod grwpiau cynulleidfa sydd wedi’u tangynrychioli, wedi’u hymyleiddio neu’n anodd eu cyrraedd
- Cynnwys cynrychiolwyr grwpiau defnyddwyr mewn unrhyw weithdy cynllunio strategaeth
- Adnabod a gosod safonau ar gyfer hygyrchedd o fewn y prosiect yn seiliedig ar anghenion defnyddwyr
4. Creu strategaeth hygyrch
Mae cynnal proses datblygu strategol cynhwysol yn golygu creu strategaeth sydd yn hygyrch.
Fodd bynnag, nid oes strwythur safonol ar gyfer strategaeth ddigidol. Gall hyn gymhlethu deall beth i’w gynnwys.
Gall cynnwys gormod greu strategaeth hir a llai hygyrch. Gall defnyddio iaith gymhleth ei gwneud yn anodd ei darllen.
Felly dylai dogfen strategaeth gynhwysol fod yn gyflym ac yn hawdd ei darllen.
Gallai eich strategaeth ddigidol gynnwys:
- Amcanion penodol, mesuradwy ar gyfer trawsnewid digidol
- Personâu defnyddwyr
- Canllawiau ar wasanaeth digidol cynhwysol a datblygu sianelau
- Amlinelliad o brosiectau penodol sydd eisoes yn cyflawni’r amcanion strategol
Meddyliwch sut i greu dogfen orffennol sydd yn hygyrch. Er enghraifft:
- Defnyddio delweddau a ffeithluniau
- Creu fersiwn ‘hawdd ei ddarllen’ ar gyfer pobl ag anableddau dysgu
- Creu fersiwn sain ar gyfer pobl â nam ar eu golwg
- Crynhoi’r strategaeth ar un dudalen
Adnoddau defnyddiol
Adnoddau, safonau a chanllawiau ar gyfer creu strategaeth ddigidol gynhwysol a hygyrch:
- Canllaw Cynllunio Cynhwysol Microsoft
- Llawlyfr Gwasanaeth Gov.uk ar brofi hygyrchedd
- Safon ryngwladol Canllawiau Hygyrchedd Cynnwys Gwe
- App gwirio iaith hygyrch Hemingway
- Delweddau stoc amrywiol o ran hil
- Delweddau stoc sydd yn cynnwys pobl ag anableddau
Wedi'i gomisiynu gan Catalyst
